Téh NH Ngeblog

 

ANALISIS UTS NGANGGO GOOGLE FORM

Asa-asa tadina mah, waktu rék nangtukeun naha UTS téh ku cara online atawa ngabagikeun kertas ulangan. Lain kunanaon, lamun ku cara online, sieun ngabeuratkeun dina kuota, sieun teu bisaeun carana, sieun ngaripuhkuen kolotna. Komo ningali guru-guru nu lian ngaleprint soal mah, tuluy sorangan gé ngamimitian nyieun soal manual. Maklum kakarak ayeuna deui boga pancén nyekel kelas. Tapi sanggeus dipikir dibulak-balik, tungtungna diputuskeun nyieun soal nganggo google form.

Aya sababaraha alesan pangna diputuskeun UTS ku cara online. Kahiji pan barudak diajarna gé online, nya naon salahna mun ulangan gé online. Kadua itung-itung diajar boh keur kuring boh keur barudak, kumaha cara ulangan online. Katiluna itung-itung ngalalanyah, sangkan barudak leuwih biasa deui diajar daring, apan engké kahareupna bakal meunang kuota téh kuota diajar, lebar lamun teu dipaké. Kabeneran kungsi ngiringan pelatihan online kumaha carana nyieun formulir dina google form, nya nyobaan diajar nyieun soal ogé.

Poé kahiji, Senén 21 September 2020, ulangan PPKn. Teu loba soal nu dijieunna gé, ukur 10 siki jaba pilihan ganda. Barang link dibagikeun, grup WA langsung ramé.

“Ibu, teu kabuka!”

“Bu, muter waé!”

“Bu, kumaha carana?"

Padahal saméméhna tos dibéjaan cara-carana. Disabaran wéh, antukna ngabéjaan gé sababaraha kali.

“Atos kabuka, Bu, Nita tos ngirim!”

“Bu, Kiki gé atos!"

“Bu, ieu nu Ayu, peunteunna 10!" (Ngirimkeun Skrinshoot tanggapan), tungtungna méh sadayana ngirimkeun SkrinShoot, Aya nu peunteun 9, 8, 6, ngan seuseueurna peunteun 10 (dibéjaan kitu ku kolotna? Wallahu’alam 😂 )

Alhamdulillah, teu burung geuning tariasaeun. Ngahaja méré waktu ngeusian soal jam sabaraha waé, nu penting dina poé éta kénéh, da lolobana mah HP gaduh kolotna, aya nu dicandak heula damel, aya nu dianggo heula lanceukna.  Ngagebeg téh barang soréna dicék. Naha mani aya 62 tanggapan? Padahal budak aya 43, jaba nu teu gaduh HP aya genepan. Singhoréng budak téh aya nu ngirim dua kali, tilu kali, malah aya nu opat kali.   

Ningali tina hasil peunteun mah nu ngirim nepi dua tilu kali téh nu tadina peunteunna kurang alus. Jigana panasaran hayoh ngeusian deui, ngirim deui. Tapi aya ogé nu kiriman mimiti tos 10, terus bet aya ngirim deui kalah jadi 8, terus ngirim deui 9, ngirim deui 10. Hadeuuh, jadi hayang seuri, jigana resepeun ngeusian google form téh, jaba ukur sababaraha menit langsung bérés, jadi wéh panasaran kénéh tuluy hantem ngeusian deui, ngirim deui. Rumasa émangna gé teu dikonci ku cukup sakali ngirim, da éta pan aya nu nganggo hiji HP ku duaan, aya nu teu gaduh HP tuluy nambut ka réréncanganana. Lamun dikonci ku hiji tanggapan, karunya ka anu teu gaduh HP.

Terang kitu mah tuluy ngumumkeun dina grupWA, sangkan ngirim jawaban cukup sakali, ulah dua komo opat kali. Nu ngirim sababaraha kali ogé nu asup kana daftar nilai mah nu kiriman mimiti, sanajan kiriman kadua jadi leuwih alus, tapi teu kaci. Matak saterusna diomat-omatan sangkan dina ngeusian sing ati-ati, ulah sagawayah. Alhamdulillah isukna jeung saterusna UTS online lancar, ukur hiji dua nu masih aya nu ngirim dua kali.

Genaheun ulangan nganggo google form téh, hasilna langsung katara, malah dina “tanggapan” nu katampa ku urang salaku guru bakal katingali soal nomor sabaraha nu salah, soal nomor sabaraha nu bener. Nu kieu téh mun dina manual mah kaasup kana analisis ulangan. Maksud analisis ulangan sangkan guru bisa nganyahokeun kana kamampuh budak dina neuleuman matéri naha geus paham atawa acan, bisa jadi analisis kana soal naha kaasup gampang, sedeng atawa bangga.   Tina hasil analisis éta, kahareupna bisa dijadikeun bahan keur guru naha matéri téh kudu dibalikan deui atawa cukup ku méré rémédial ka sabagian atawa saurang budak.

Kalemahanana, ulangan online kieu téh gedé kamungkinan dibéjaan ku kolotna. Komo ieu karak kelas tilu,bisa disebut kelashandap kénéh. Tapi kétang sanajan ulangan ku kertas ogé ari migawéna di imah mah nya tetep wéh lolobana mah dibaréjaan ku kolotna. Keun lah, nu penting mah budak daékeun diajar, da ari diomat-omatan mah atos, sangkan budak ngeusian soal sorangan, kolot mah cukup ku nalingakeun. Tapi nya kitu téa, katara tina hasil ulangan nu rata-rata 10, padahal ari ulangan di sakola mah iraha teuing peunteun 10.  Deui-deui keun waé, da ku daék ngareusian ulangan online gé tos pirang-pirang nuhun, aya usaha ti mimiti nyempetkeun waktu, kuota, jeung pikiran. Nu jelas, sanajan dibéjaan ku kolotna, maca-maca soal acan mah meureun ku budak, piraku ku kolotna onaman mah. Tapi bisa waé kétang, maca jeung ngeusianana ku kolona ogé, pan guru mah teu apal, héhé…

Terus kumaha atuh ari kitu? Ah, keun waé, da bongan kieu jamanna. Asa lumrah lamun budak atawa kolot hayang boga peunteun gedé nalika ulangan. Ngan meureun peunteun kajujuran nu hésé meunteunna. Mugia wéh sasalad sing geura ilang, sangkan sanajan ulangan online, tapi bisa dilaksanakeun di sakola. Naha ka sakola mawa HP? Ih lain, di sakola kudu siap pakakas komputerna, internetna, jeung sajabana. Mugia.

 

#Carita_NH

28-09-2020